“Знайсці сябе” – так называецца чарговая кніга Галіны Антонавай, журналісткі газеты “Светлы шлях”, члена Саюза пісьменнікаў Беларусі. З гэтай нагоды Смаргонская раённая бібліятэка правяла прэзентацыю новага выдання.

Ва ўтульнай зале сабраліся госці і героі кнігі  – кіраўнікі прадпрыемстваў і арганізацый Смаргоншчыны, народныя майстры Беларусі, гісторыкі, паэты, скульптары, артысты, спартсмен, музыка  і нават пячнік… Заслужаныя і паважаныя людзі, таленавітыя, апантаныя, улюблёныя ў жыццё і сваю працу.

Галіна Антонава падзялілася з гасцямі гісторыяй стварэння выдання, расказала пра сустрэчы і людзей, чые жыццёвыя гісторыі леглі ў аснову кнігі. Цікавыя пытанні ад вядучых ператварыліся ў захапляльны дыялог, падчас якога ўдзельнікі сустрэчы расказалі пра свой шлях пераадолення цяжкасцяў і дасягнення поспеху, пра пачуцці і ідэі, пра пошук уласнай місіі, якая дапамагае ўсвядоміць, што кожны з нас можа пакінуць пасля сябе.

Асаблівы шарм вечару надалі музычныя нумары, якія стваралі цудоўны настрой і ідэальна дапаўнялі праграму мерапрыемства.

Святочная імпрэза была дапоўнена дэгустацыяй смачных каш камбіната хлебапрадуктаў,  выставай, на якой героі прадставілі свае кнігі, узнагароды, хатні хлеб і смаргонскія абваранкі, зробленыя па старажытным рэцэпце.

Прэзентацыя прайшла ў цёплай атмасферы. Гэта было не проста мерапрыемства, а сапраўдная цёплая сустрэча цікавых людзей.  Госці мелі магчымасць набыць экзэмпляр з аўтографам аўтара.