Сёння Гродзенская абласная навуковая бібліятэка стала цэнтрам прыцягнення для ўсіх, хто шануе прыгажосць літаратурнага майстэрства. Тут адбылося ўрачыстае мерапрыемства “20 гадоў на службе слову”, прысвечанае знамянальнай даце – 20-годдзю Гродзенскага абласнога аддзялення ГА “Саюз пісьменнікаў Беларусі”.
Сярод ганаровых гасцей прысутнічалі старшыня Гродзенскага абласнога Савета дэпутатаў Пасюта Алена Васільеўна, начальнік галоўнага ўпраўлення ідэалагічнай работы і па справах моладзі Гродзенскага аблвыканкама Булаўка Ігар Міхайлавіч, намеснік начальніка ўпраўлення культуры Гродзенскага аблвыканкама Куратчык Сняжана Віктараўна, старшыня Гродзенскай абласной арганізацыі Беларускага прафсаюза работнікаў культуры, інфармацыі, спорту і турызму Малевіч Дзяніс Віктаравіч і іншыя, якія павіншавалі членаў абласнога аддзялення і ўручылі пісьменнікам заслужаныя ўзнагароды.

Дырэктар абласной бібліятэкі імя Я.Карскага Ігнатовіч Марына Эдвардаўна адзначыла: “Бібліятэка і пісьменнікі звязаны яшчэ з тых часоў, калі дырэктарам нашай установы быў бацька Максіма Багдановіча Адам Ягоравіч, калі жыла ў доме па вуліцы Садовай Эліза Ажэшка і ўжо звыш 60 гадоў тут знаходзіцца юнацкі аддзел і створаны мемарыяльны пакой пісьменніцы. Найбольш прадуктыўнымі сталі апошнія два дзесяцігоддзі,  мы маем цеснае супрацоўніцтва з пісьменніцкай арганізацыяй Прынёмання. Прэзентацыі кніг, творчыя сустрэчы, анлайн-праекты, святы паэтычнага слова, тэатралізаваныя прадстаўленні, фестываль кнігі і многае іншае – вынік нашай  сумеснай працы.”

Вечар адкрылі з прыемнай ноты віншаванняў вядучыя: старшыня Гродзенскага абласнога аддзялення Кебіч Людміла Антонаўна і намеснік старшыні – Радзівончык Дзмітрый Мікалаевіч.
Кожны з сяброў абласной арганізацыі ўнёс сваю непаўторную нотку чараўніцтва ў гэты святочны вечар: гучалі праніклівыя вершы, выконваліся песні ўласнага сачынення, напоўненыя глыбокім сэнсам і шчырымі пачуццямі.
Гродзенскае абласное аддзяленне Саюза пісьменнікаў Беларусі — гэта не проста аб’яднанне таленавітых людзей, але і магутная сіла літаратурнага слова, якое здольна натхняць і ўзбагачаць духоўнае святло грамадства.
Віншуем юбіляраў і жадаем ім новых творчых поспехаў, невычэрпных ідэй і ўдзячных чытачоў!