Міжнароднае супрацоўніцтва

Інфармацыйны цэнтр Пасольства ЗША
Гродзенская абласная навуковая бібліятэка імя Я.Ф.Карскага з 2005 года супрацоўнічае з Інфармацыйным цэнтрам пасольства ЗША. 25 студзеня 2005 года па рэкамендацыі Міністэрства культуры Рэспублікі Беларусь падпісана пагадненне, на аснове якога пры аддзеле выданняў на замежных мовах быў адкрыты “Амерыканскі куток” (зараз Grodno InfoUSA ці “Усё аб ЗША”). Рэалізуюцца сумесныя творчыя праекты і праграмы, накіраваныя на вывучэнне англійскай мовы, гісторыі, літаратуры і культуры ЗША і краін свету.
У межах пагаднення аб супрацоўніцтве чытачы абласной бібліятэкі сустракаліся з кіраўнікамі і супрацоўнікамі дыпламатычнай службы: Джорджам Кроллам, Майклам Скэланам, Ітанам Голдрычам, Робертам Райлі, Пітэрам Слоўнам, Элісан Маккой і інш., а таксама музычным гуртом “Джоні Роджэрс Бэнд”.
За перыяд 2011-2018 гг. Гродзенскай абласной навуковай бібліятэкай імя Я.Ф.Карскага атрымана ад Дзярждэпартамента ЗША бязвыплатная замежная дапамога ў памеры 50526 $ ЗША, якая накіравана на набыццё літаратуры і электронных баз дадзеных на англійскай мове, а таксама ўмацаванне матэрыяльна-тэхнічнай базы бібліятэкі: закупку сучаснай камп’ютарнай і офіснай тэхнікі, акустычнай сістэмы, абсталявання для работы са сродкамі віртуальнай рэальнасці і інш.

 

Рэспубліка Польшча
Вынікам шматгадовага супрацоўніцтва Гродзенскай абласной навуковай бібліятэкі імя Я.Ф.Карскага з Генеральным консульствам Рэспублікі Польшча ў Гродне і Гродзенскім гарадскім аддзяленнем ГА “Саюз палякаў на Беларусі” стала сумеснае адкрыццё ў юнацкім філіяле мемарыяльнага пакоя, прысвечанага жыццю і творчасці сусветна вядомай пісьменніцы Элізы Ажэшкі.
ДУК “Гродзенская абласная навуковая бібліятэка імя Я.Ф.Карскага” падтрымлівае цесныя сувязі з Падляскай ваяводскай бібліятэкай імя Л.Гурніцкага і Публічнай бібліятэкай імя М.Канапніцкай у Сувалках. Дзякуючы супрацоўніцтву папаўняецца фонд польскамоўнай літаратуры, праводзяцца Міжнародныя навукова-практычныя канферэнцыі, адбываецца абмен вопытам работы, метадычнымі і інфармацыйнымі матэрыяламі ў сферы бібліятэчнага абслугоўвання насельніцтва.
Сумесна з Публічнай бібліятэкай імя М.Канапніцкай у Сувалках рэалізаваны два праекты ў межах праграм транспамежнага супрацоўніцтва “Польшча – Беларусь – Украіна”, прафінансаваныя Еўрасаюзам:
⚫“Пошук агульных культурных каранёў Беларусі і Польшчы” – у выніку якога выдадзена сумесная творчая праца – бібліяграфічны паказальнік “Бібліяграфія рэгіёнаў: Сувальшчыны і Гродзеншчыны”;
“Мультыцэнтр” – інтэрактыўныя цэнтры навукі і тэхналогій у Сувалках і Гродна” – створаны інавацыйныя, высокатэхналагічныя, вучэбныя цэнтры, якія адапавядаюць патрабаванням ХХІ ст. Агульны бюджэт праекта склаў 1 118 602,37 еўра. У адпаведнасці з Грант-кантрактам сума беларускага боку – 447 683.90 еўра, з іх 10% накіраваны са сродкаў абласнога бюджэта.

 

Літоўская Рэспубліка
Гродзенскай абласной навуковай бібліятэкай імя Я.Ф.Карскага па міжнароднаму абмену з публічных бібліятэк Літоўскай Рэспублікі атрымана звыш 70 электронных копій рэдкіх выданняў, фотаздымкаў, дакументаў, сярод якіх “Памятныя кнігі Віленскай губерніі”.
Галоўная кніжніца Гродзеншчыны супрацоўнічае з Літоўскай нацыянальнай бібліятэкай імя М.Мажвідаса і Вільнюскай абласной публічнай бібліятэкай імя А.Міцкевіча: праводзяцца Міжнародныя навукова-практычныя канферэнцыі, семінары, круглыя сталы па абмену вопытам работы ў сферы бібліятэчнай справы.

 

Інстытут імя Гётэ ў Мінску
З 1996 года ў аддзеле выданняў на замежных мовах Гродзенскай абласной навуковай бібліятэкі імя Я.Ф.Карскага працуе цэнтр самастойнага вывучэння нямецкай мовы, у фондзе якога знаходзяцца кнігі і мультымедыйныя выданні з Германіі і пра Германію.
Сумесна з Інстытутам імя Гётэ ў Мінску праведзены творчыя сустрэчы чытачоў з нямецкамоўнымі пісьменнікамі Б.Шэр, Г.Гюнтэрам і Г.Кушнаровай, а таксама арганізавана інтэрактыўная выстава “Экамысленне: вучымся ў прыроды”.

 

Пасольства Францыі ў Мінску
Падчас супрацоўніцтва Гродзенскай абласной навуковай бібліятэкі імя Я.Ф.Карскага з Пасольствам Францыі ў Мінску ў аддзеле выданняў на замежных мовах створана і дзейнічае перасоўная бібліятэка, якая ўключае кнігі, аўдыё- і відэаматэрыялы па гісторыі і культуры Францыі, выданні французскіх аўтараў на французскай і рускай мовах.
Сістэматычна для настаўнікаў французскай мовы праводзяцца метадычныя семінары і адукацыйныя праграмы.