Цудоўны свет беларускіх дзіцячых кніг
Паважаныя чытачы!
Прапануем Вашай увазе новыя цікавыя дзіцячыя кнігі беларускіх пісьменнікаў для чытачоў малодшага і сярэдняга школьнага ўзросту, якімі папоўніўся фонд дзіцячага аддзела бібліятэкі.
Зізюк, М. Шчасце маленькага камінара : казка / Міхась Зізюк. – Гомель : Барк, 2023. – 91 с.
У чарговай кнізе пісьменніка Міхася Зізюка маленькія чытачы пазнаёмяцца з хлопчыкам Ігнасікам, які ідзе ў горад Трох Вежаў, каб вызваліць сваіх родных з палону. Ігнасік – камінар. Без іх раней ніяк не было абысціся. Таму што з кожнай печы, з кожнай грубкі наверх, вышэй даху, цягнуліся коміны з цэглы. А іх трэба было чысціць. Вось гэтай справай і займаліся камінары. У казцы шмат прыгод і здарэнняў, а разам з імі і шмат любові да ўсяго жывога. Самымі лепшымі пачуццямі ў новым выданні пісьменніка з’яўляюцца дабрыня, сяброўства, міласэрнасць і справядлівасць.
Кавальчук, Т. В. Тайна Малінавай планеты : казка / Тамара Кавальчук. – Мінск : Звязда, 2023. – 52 с.
Тамара Кавальчук – аўтар 21 кнігі, пяць з іх – для дзяцей. Лаўрэат шэрагу літаратурных конкурсаў. Піша ў розных літаратурных жанрах. Адна з тэм, якая хвалюе пісьменніцу, – узаемаадносіны чалавека і прыроды. У казцы «Тайна Малінавай планеты» распавядаецца пра вандроўку дзяўчынкі Квятаначкі на іншую планету з назвай Малінавая. Гісторыі, што здараюцца з гераіняй, дапамагаюць дзецям больш глыбока зразумець іхняе асабістае стаўленне да навакольнага асяроддзя ва ўсіх яго праявах. На працягу ўсяго часу маленькая прадстаўніца Зямлі вучыць усіх дабрыні, чуласці, добразычлівасці, любові да сваіх супляменнікаў і жыхароў усяго Сусвету.
Коршак, А. М. Канікулы ў цёці Клавы / Алеся Коршак. – Мінск : Беларусь, 2023. – 29 c.
Алеся Коршак – пісьменніца, аўтар кніг “Беларуская міфалогія для дзяцей” і “Беларускія народныя святы для дзяцей”. Казка “Канікулы ў цёці Клавы” пазнаёміць чытачоў з васьмігадовай дзяўчынкай Дашай, якая прыехала на чарговыя летнія канікулы да сваёй цёці Клавы. Вядома, прыгоды – гэта заўсёды цікава. Разам са сваім стрыечным братам Ягорам дзяўчынка адшукае ката Праменчыка, трапіць у цікавыя казачныя гісторыі, здзейсніць чароўныя падарожжы і навучыцца шэрагу карысных рэчаў.
Курек, Е. Мальчишкины рассказы / Елена Курек. – Минск : Народная асвета, 2023. – 45 с. – (Библиотека Асветика).
Елена Курек – автор детских стихов, сказок, рассказов, победительница конкурса «LitUp-2022». Совсем недавно вышла её первая книга под названием «Мальчишкины рассказы». В этом сборнике вы познакомитесь с обычными мальчишками, которые попадают в разные ситуации и всегда находят правильные решения, учатся чему-то новому, учатся дружить, и, конечно же, взрослеют. Много интересного и полезного сможет найти для себя юный читатель, ведь каждый день Артёма, Андрея, Вовки и их друзей не похож на предыдущий и непременно сулит новые приключения, неожиданные и смешные. В общем, читайте, скучно не будет!
Мельнікаў, А. І. Вавёрачка : казкі і матэматычныя задачы / Алег Мельнікаў. – Мінск : Звязда, 2023. – 109 с.
Выдавецкі дом «Звязда» працягвае радаваць цікавымі кніжкамі дзяцей. З нядаўніх – «Вавёрачка» Алега Мельнікава з цудоўнымі ілюстрацыямі мастака Уладзіміра Жука. У першай частцы гэтай кнігі змешчаны літаратурныя казкі пра Вавёрачку, разнастайныя цікавыя гісторыі, у якіх ёй дапамагаюць сябры: Сава, Заяц і Вожык. Сапраўды: казка — рэчаіснасці падказка. Прачытаўшы іх, хлопчыкі і дзяўчынкі атрымаюць для сябе важныя ўрокі паводзін, даведаюцца, як дзейнічаць самім, калі спатрэбіцца дапамога блізкім ці знаёмым. Другая частка кнігі прысвечана навучанню школьнікаў матэматыцы, прапаноўваюцца сюжэтныя матэматычныя казачкі-задачы. У канцы кожнай главы дадзены падказкі і рашэнні задач.
Міус, Ж. В. Трэмс-тамс-таць! Пара чараваць! : казкі / Жанна Міус. – Мінск : Звязда, 2023. – 53 с.
Жанна Міус – маладая аўтарка з горада Магілёва, чые пацешныя персанажы вельмі падабаюцца дзецям. У яе чарговай кнізе «Трэмс-тамс-таць! Пара чараваць!» пад адной вокладкай сабраны казкі з прыгожым мастацкім афармленнем. Кожны з хлопчыкаў і дзяўчынак можа стаць чараўніком, калі вельмі таго захоча. Варта толькі крыху памарыць ‒ і пачнуць з’яўляцца на свет рыжыя коткі на пуантах, ружовыя пяшчотазаўры, смешныя хатнічкі Прачну́ці, якія нябачна будзяць людзей уранку, і іншыя смяшлівыя асобіны дзівакаватага выгляду. Адкрываем новую кнігу ‒ прыйшла пара чараваць!
Шчарбакова, А. Я. Казкі з чароўнай скарбонкі / Алена Шчарбакова. – Мінск : Звязда, 2023. – 45 с.
У новай кнізе беларускай дзіцячай пісьменніцы Алены Шчарбаковай змешчаны казкі з вынаходлівымі, цікавымі сюжэтамі, яркімі, незвычайнымі персанажамі, якія прывабліваюць сваёй багатай фантазіяй, тонкай назіральнасцю і светлым гумарам. Перагортваючы старонкі гэтай цудоўнай маляўнічай кнігі, чытачы разам з героямі казак даведаюцца пра чароўныя словы, пра сяброўства шпака і дзятла, а таксама далучацца да свету спрадвечных духоўных каштоўнасцей.
Новыя кнігі беларускіх пісьменнікаў ужо можна атрымаць у дзіцячым аддзеле на вул. Савецкай, 25.