10 чэрвеня ў кінатэатры “Космас” адбыўся прэм’ерны паказ першага паўнаметражнага беларускага анімацыйнага фільма “Звёзды седьмого неба” з удзелам Алены Віктараўны Туравай – рэжысёра, сцэнарыста, пісьменніцы.

“Звёзды седьмого неба” − гэта фільм-выслоўе, які ў фантазійна-музычнай форме распавядае пра сілу мары, а  Алена Турава  з’яўляецца для яго і рэжысёрам-пастаноўшчыкам, і аўтарам сцэнарыя.

Выстава выданняў з фондаў дзіцячага філіяла абласной бібліятэкі  “Чароўны свет дзіцячых кніг” сустракала маленькіх гледачоў перад кінапраглядам. На ёй былі прадстаўлены творы беларускіх пісьменнікаў: У. Караткевіча,  А.Бутэвіча, А. Масла, К. Хадасевіч-Лісавой, Г. Аўласенкі, А. Якімовіча, Т. Дамаронак, В. Гапеева, А. Жвалеўскага і Я. Пастэрнак, а таксама зборнікі беларускіх казак, міфаў і паданняў. Зацікавілі маленькіх чытачоў і творы замежных аўтараў у перакладзе на беларускую мову: “Малы і Карлсан” А. Ліндгрэн, “Маленькі прынц” А. Сент-Экзюперы, “Віня-Пых” А. Мілна  і ”Казкі дзядзечкі Рымуса” Дж. Харыса.

Дзеці мелі магчымасць пазнаёміцца з творамі ганаровай госці – фантастычнымі аповесцямі Алены Туравай “КиндерВилейское привидение” і “Рыжик в Зазеркалье”, якія карыстаюцца папулярнасцю. Вядомая пісьменніца суправадзіла свае творы аўтографамі і пажаданнямі “добрых чудес” маленькім чытачам дзіцячага філіяла.

Алена Турава сустрэлася з гледачамі, разыграла падарункі і з радасцю згадзілася пафатаграфавацца з усімі жадаючымі.

Выказваем шчырую падзяку дырэктару кінатэатра “Космас”  Жылінскай Кацярыне Сяргееўне за садзейнічанне ў арганізацыі выставы.