22 красавіка адзначаецца Міжнародны дзень Зямлі. Дата была ўсталявана з мэтай заклікаць кожнага з нас задумацца аб тым, чым ён можа дапамагчы ў вырашэнні экалагічных праблем.

Дзіцячы філіял запрасіў дашкалят старэйшай групы дзіцячага садка №18 на экалагічную гадзіну, прысвечаную Дню Зямлі.

Маленькія “чамучкі” адправіліся ў падарожжа разам з дапытлівай Кропелькай. Яны даведаліся пра ўласцівасці вады, пра яе шлях у кватэры і вадаправод як складаны комплекс інжынерных збудаванняў, а яшчэ паглядзелі пазнавальны мультыплікацыйны фільм пра ГЭС. Уразілі дашкалят таямнічыя легенды аб Гараднічанцы і досведы з вадой, удзельнікам якіх стаў кожны з прысутных.

Суправаджальная гутарка па асновах экалагічных ведаў адзначыла месца чалавека ў экасістэме Зямлі. Кніжная выстава пазнаёміла будучых першакласнікаў з тэматычнымі палічкамі “Зялёны цуд − Зямля”, “Вада – крыніца жыцця” і “Па старонках Чырвонай кнігі Беларусі”: энцыклапедычнымі выданнямі, прысвечанымі надвор’ю і клімату, жывёльнаму і расліннаму свету, прыродным экасістэмам і экалагічным праблемам планеты.

На мерапрыемстве знайшоўся час і для карыснай гульні: крэатыўная лабараторыя ЛЕГА выклікала захапленне і жаданне  ажыццявіць творчыя задумы.