У чэрвені 2020 года сталі вядомы імёны лаўрэатаў III Абласнога конкурсу рукапісаў імя Цёткі, сярод якіх – беларуская паэтэса, старшыня Гродзенскага аддзялення Саюза пісьменнікаў Беларусі Людміла Кебіч, а таксама дзiцячая пiсьменнiца, лаўрэат Прэмii iмя А.I.Дубко і Нацыянальнай лiтаратурнай прэмii Ганна Скаржынская-Савіцкая.

Галоўная адметнасць гродзенскага конкурсу змяшчаецца ў яго назве: аўтары дасылаюць свае рукапісы, а не гатовыя кнігі, таму пераможцы маюць магчымасць надрукаваць свае творы і гэтым папоўніць культурную спадчыну Гродзеншчыны.

25 сакавіка ў сценах ДУК “Гродзенская абласная навуковая бібліятэка імя Я.Ф.Карскага” пройдзе прэзентацыя навінак друку, аўтарамі якіх сталі лаўрэаты III Абласнога конкурсу рукапісаў імя Цёткі.

Вы пазнаёміцесь з апошнім паэтычным зборнікам Людмілы Кебіч, які носіць назву “Трыялеты. Тэрцыны. Рандэлі”. Менавіта ён атрымаў перамогу сярод іншых рукапісаў у намінацыі “Паэзія” як прадаўжэнне і вялікая павага да доўгіх эстэтычных традыцый вершаскладання.

Паэтэса таксама прэзентуе цудоўную дзіцячую кніжачку “Бэрак, Бэрак, дай цукерак!”, якая абавязкова зацікавіць маленькіх чытачоў сваімі міфалагічнымі персанажамі, раскажа шмат цікавага з беларускага фальклору і стане добрым сябрам у выхаванні.

Свае прыгожыя дзіцячыя кнігі прадставіць Ганна Скаржынская-Савіцкая.

Казка “А ў нас – зорны час” – лаўрэат Абласнога конкурсу рукапісаў імя Цёткі – разам з вясёлымі звяркамі-героямі у гульнёвай форме знаёміць дзетак з беларускімі фразеалагізмамі, крыніцамі народнай мудрасці.

“Маме я нясу букецік” – гэта калекцыя цёплых і сонечных твораў для юных чытачоў, якія ў забаўляльнай манеры навучаць любіць сям’ю і раскажуць пра светлы вобраз маці.

Кніга “Сёма і Адзінка” праз цікавыя і пазнавальныя казкі пра школьнае жыццё дапамогуць дзецям зрабіцца больш выхаванымі, сціплымі і з павагай адносіцца да прыроды.

Сардэчна запрашаем на прэзентацыю навінак ад гродзенскіх аўтараў 25 сакавіка па адрасе: вул. Карбышава, 17!

Даведкі па тэлефоне: 71-89-41.