Гучныя чытанні твораў беларускіх аўтараў адбыліся ў юнацкім аддзеле да Сусветнага дня чытання ўслых. Вучні сярэдняй школы № 38 прынялі ўдзел у кніжным марафоне, выразна чыталі вершы беларускіх пісьменнікаў: Я. Купалы, Я. Коласа, У. Караткевіча, Р. Барадуліна, М. Багдановіча і інш.

Вусныя формы аповеда былі самым першым спосабам захавання чалавечых ведаў і перадаваліся яны багатай і яскравай мовай, што спрыяла лепшаму іх запамінанню. Сусветны дзень чытання ўслых дапамагае нам вярнуць гэтую традыцыю – выразна і красамоўна перадаваць інфармацыю адзін аднаму, прыгожа размаўляць і, адначасова, папулярызаваць пісьменнасць.

Карысць​ чытання​ ўслых​ цяжка​ пераацаніць,​ бо​ яно​ вучыць​ нас сістэматычна чытаць,​ адгукацца на прачытанае і творча мысліць, развівае​ памяць​ і​ ўзбагачае слоўнікавы​ запас,​ паляпшае дыкцыю​ і​ павялічвае​ ўзровень пісьменнасці.​ Вядома, што чытанне ўслых спрыяе развіццю прыгожай мовы і павышае граматнасць асобы. Але​ самае​ галоўнае​ –​ чытанне​ ўслых​ вучыць​ нас​ любіць​ кнігі!​