Таямніца незвычайнай школы
Хадасевіч-Лісавая, К. С. Таямніца незвычайнай школы : казачная аповесць / Кацярына Хадасевіч-Лісавая ; [мастак А. Карповіч]. – Мінск : Звязда, 2018. – 212, [3] с. ББК 84(4Беи)6
Сучасная беларуская пісьменніца Кацярына Хадасевіч-Лісавая піша кнігі для дзяцей і пра дзяцей. Важнай роляй пісьменніка яна лічыць выхаванне дзіцяці. Таму ў кожнай сваёй казцы разам з прыгодамі, забавамі і весялосцю пісьменніца нагадвае аб галоўных каштоўнасцях: дабрыні, міласэрнасці, шчырасці, узаемадапамозе.
Юныя чытачы ўжо знаёмыя з кнігамі К. Хадасевіч-Лісавой “Казкі Сіняй падушкі”, “Касмічная адысея хлопчыка Стасіка”, “Канікулы з прыгодамі”, “Казкі сівой даўніны”, “Казкі чараўніцы Зімы” і іншымі.
Новая кніга пісьменніцы “Таямніца незвычайнай школы” – казачная аповесць, героі якой маюць рэальныя прататыпы. Гэта вучні Ждановіцкай школы, дзе Кацярына Хадасевіч-Лісавая працуе настаўніцай.
Здавалася б, пра школу мы ведаем усё: настаўнікі, урокі, перапынкі, навучальны год, канікулы… І вам, пэўна, думаецца, што нічога асаблівага ў школе здарыцца не можа. А ці ведаеце вы, што адбываецца, калі ўсе дзеці і настаўнікі разыходзяцца па дамах? Якую таямніцу захоўваюць школьныя кабінеты і калідоры? Хто жыве ў адной, з выгляду самай звычайнай, школе? А магчыма, не толькі ў ёй…
Гэта цёплая, добрая і вясёлая казачная аповесць складаецца з дзесяці чароўных гісторый. Кожная з іх раскажа вам пра неверагодныя падзеі, якія адбываюцца з героямі кнігі. І у вас ёсць магчымасць пабачыць усё на свае вочы! Прачытаўшы гэтую займальную кнігу, вы пазнаёміцеся з незвычайнымі персанажамі – Школусем і яго памочнікамі-класавічкамі Асікам, Бэсікам, Вэсікам, Квятусяй. Вы даведаецеся, кім быў раней Школусь, хто такія класавічкі, як і чаму яны з’явіліся менавіта ў гэтай школе, дзякуючы чаму яны могуць стаць нябачнымі…
Паглыбляйцеся ў сюжет, падключайце фантазію – зазірніце ў незвычайную школу і даведайцеся пра ўсе яе сакрэты! А таямніцу трэба шукаць у персанажах, аб існаванні якіх ніхто нават не здагадваецца, а яны між іншым жывуць у кожнай школе.
Прыгожыя , маляўнічыя акварэльныя ілюстрацыі таленавітага мастака Алены Карповіч дапамогуць вам яшчэ больш акунуцца ў свет казкі, абудзяць вашу фантазію і уяўленне.
Гэта цікавая казачная гісторыя прыйдзецца даспадобы чытачам малодшага школьнага ўзросту.
За кнігай звяртайцеся ў дзіцячы філіял бібліятэкі (вул. Савецкая, 25).