“Янка Купала – асоба, творца, час”
З 6 па 12 ліпеня ў абанементным аддзеле бібліятэкі праходзіць купалаўскі тыдзень “Янка Купала – асоба, творца, час”. Галоўная мэта выставы – пазнаёміць аматараў чытання з кнігамі пра жыццё і творчасць пісьменніка, а таксама з культурнай спадчынай самаго Я.Купалы: поўнымі зборамі твораў аўтара, якія выдаваліся ў розныя гады (1961, 1972, 1995), з асобна надрукаванымі яго вершамі, паэмамі, п’есамі і перакладамі на беларускую мову, з факсімільнымі пецярбургскімі выданнямі зборнікаў вершаў “Жалейка” (1908) і “Шляхам жыцця” (1913), з выданнем п’есы “Тутэйшыя” (Мюнхэн, 1953), якая амаль 60 гадоў была пад забаронай для пастаноўкі і апублікавання і прынесла Янку Купалу гонар і славу толькі праз дзесяцігоддзі.
Дзеля дасягнення мэты купалаўскага тыдня ў абанементным аддзеле падрыхтаваны прагляд літаратуры “Магутны талент Я.Купалы”, на якім можна знайсці ўнікаьныя выданні, як, напрыклад, пераклады яго 22 санетаў на 16 моў свету ў кнізе Купала Я. “Санеты: на беларускай армянскай, грузінскай, іспанскай, кітайскай, літоўскай, мангольскай, рускай, сербскай, славацкай, табасаранскай, татарскай, украінскай, французскай, чачэнскай, чувашскай, шорскай мовах. Асабліва вылучаецца інтэрнацыянальная кніга аднаго верша Я. Купалы “А хто там ідзе?”, якая змяшчае пад сваёй вокладкай пераклады гэтага твора на 101 мову свету.
Чытачам, якія жадаюць пашырыць свае веды пра жыццёвы і творчы шлях песняра Беларусі, яго лёс, уплыў на творчасць іншых паэтаў, супрацоўнікі аддзела раюць звярнуць увагу на першую аднатомную персанальную беларускамоўную энцыклапедыю “Янка Купала” (1986) і самую новую трохтомную энцыклапедыю “Янка Купала” (2017-2018), якія максімальна поўна асвятляюць дзейнасць народнага паэта Беларусі яшчэ і ў кіна- і тэатральным мастацтве, жывапісе, літаратуры, аналізуюць яго паэтычныя, празаічныя, публіцыстычныя, драматургічныя творы, іх змест, літаратурна-мастацкія якасці, умовы падрыхтоўкі, распавядаюць аб краінах і гарадах, якія наведаў Я.Купала, уключаюць біяграфіі людзей, з якімі ён быў звязаны пры жыцці ці якія аказалі ўплыў на яго творчасць. У выданнях апублікавана шмат новых і малавядомых на той час дакументаў і матэрыялаў, факсіміле рукапісаў твораў, шмат ілюстрацый, фотаздымкаў, асобных артыкулаў, прысвечаных мастакам, скульптарам, кампазітарам, артыстам, вучоным, пісьменнікам, крытыкам і літаратуразнаўцам.
Прагляд літаратуры “Магутны талент Я.Купалы” будзе дзейнічаць у абанементным аддзеле па адрасе: вул. Карбышава, 17, паверх 2,
каб. 201.